Bali sa Binti o Braso

Kailan dapat pumunta sa emergency room (ER)

Dapat ituring na medikal na emergency ang anumang bali sa binti o braso. Huwag igalaw ang braso o binti hanggang sa dumating ang tulong. Huwag subukang ituwid o isaayos ang buto. Maaari nitong masira ang buto. Maaari nitong mapinsala ang mga kalapit na daluyan ng dugo at mga litid. Kung mayroong nakabukang sugat, takpan ito ng malinis na tela. Ito ay upang maiwasan itong madumihan. Makatutulong ito na maiwasan ang impeksiyon.

Ano ang dapat asahan sa ER

Narito ang mangyayari sa ER: 

• Itatanong ng tagapangalaga ng kalusugan ang tungkol sa iyong pinsala at susuriin ka nang mabuti.

• Lilinisin ang anumang sugat na mayroon ka.

• Kukuhanan ng X-ray ng napinsalang bahagi.

Paggamot

Depende ang paggamot sa kung nasaan ang bali ng buto at kung saan may nakabukang sugat. Kung mayroon kang nakabukang sugat, maaari kang bigyan ng IV (intravenous) antibiotics. Maaaring hugasan ang sugat ng isterilisadong tubig. Ginagamot sa 2 yugto ang karamihan sa mga bali:

• Reduction. Ibabalik ang buto sa tamang posisyon nito, kung kinakailangan.

• Immobilization. Ilalagay sa lugar ang buto upang hindi ito gumalaw habang gumagaling. Para sa maraming bali sa braso o binti, ginagawa ito gamit ang splint o molde. Maaaring kailanganin ang operasyon ng malulubha o kombinasyon ng mga bali. Kung gayon, ipapasok ka sa ospital o isasangguni sa isang espesyalista sa buto (orthopedic surgeon).

Mga palatandaan ng bali sa binti o braso

Narito ang dapat tingnan:

• Baluktot ang binti o braso

• Mukhang wala sa lugar ang kasukasuan

• Nakalabas (protrudes) mula sa balat ang buto

• Hindi mailagay ang bigat sa binti o braso

• Namamaga o napakasakit ng binti o braso

• Manhid o kumikirot ang binti o braso

• Nakarinig ng pagputok o paglagitik sa panahon ng pinsala

• Pagkapasa