Mga Tagubilin sa Pag-uwi para sa Gastroesophageal Reflux Disease (GERD)

Pangangalaga sa tahanan

Itong mga hakbang sa pangangalaga sa tahanan ay makakatulong sa iyo na pamahalaan ang GERD:

• Manatiling malusog ang timbang. Humingi ng tulong upang mabawasan ang sobrang timbang.

• Huwag humiga pagkatapos kumain.

• Huwag kumain nang gabing-gabi na.

• Itaas ang ilalim ng gawing ulo ng iyong higaan nang 4 hanggang 6 na pulgada. Magagawa mo ito sa pamamagitan ng paglalagay ng mga bloke ng kahoy o pangtaas ng higaan sa ilalim ng gawing ulo ng iyong higaan. O maaari kang maglagay ng isang kalang sa ilalim ng kutson.

• Huwag magsuot ng masisikip na damit.

• Huwag kumain o uminom ng mga bagay na maaaring makapagpahirap sa iyong sikmura. Kasama rito ang mga pagkain o inumin na may:

  • Alak

  • Taba

  • Tsokolate

  • Caffeine

  • Spearmint o peppermint

  • Citrus o iba pang acidic juice

  • Mga paminta, bawang, sibuyas, o katulad na pampalasa

• Makipag-usap sa iyong tagapangalaga ng kalusugan kung umiinom ka ng mga gamot. Maaaring palalain ng ilang gamot ang mga sintomas ng GERD. Kabilang sa mga ito ang:

  • Mga calcium channel blocker

  • Theophylline

  • Mga gamot na anticholinergenic, tulad ng oxybutynin at benzatropine

• Magsimula ng isang programa ng ehersisyo. Magtanong sa tagapangalaga ng iyong kalusugan kung paano magsisimula. Maaaring makatulong ang mga simpleng gawain, tulad ng paglalakad o paghahardin.

• Kung naninigarilyo ka, gumawa ng mga hakbang para huminto. Sumali sa programa ng pagtigil sa paninigarilyo para mapasulong ang iyong tsansang magtagumpay.

• Limitahan ang iyong pag-inom ng alkohol.

• Kung niresetahan ka ng gamot para sa GERD, inumin ito ayon sa itinagubilin. Huwag lumaktaw ng dosis.

• Huwag uminom ng mga gamot na nonsteroidal anti-inflammatory (mga NSAID) na over-the-counter, maliban kung sabihin ng iyong tagapangalaga ng kalusugan na OK ito. Kabilang sa mga ito ang aspirin at ibuprofen. 

• Makipag-usap sa tagapangalaga ng iyong kalusugan tungkol sa paggamot kung ikaw ay buntis. Maaaring magsimula o lumala ang GERD sa pagbubuntis.

Follow-up na pangangalaga

Magpa-check up ayon sa itinagubilin ng aming kawani.

Tumawag sa 911

Tuimawag sa 911 kung mayroon ka ng alinman sa mga ito:

• May pananakit sa leeg, dibdib, o likod

• Nabulunan, umuubo, hirap sa paghinga, o humihingasing

Kailan dapat tumawag sa iyong tagapangalaga ng kalusugan

Tumawag kaagad sa iyong tagapangalaga ng kalusugan kung mayroon ka ng alinman sa mga ito:

• Hirap sa paglunok

• May pananakit kapag lumulunok

• Nakakaramdam ng pagkabara ng pagkain sa iyong dibdib o lalamunan

• Pangangasim ng sikmura na nagiging sanhi ng iyong pagsuka

• Pagsuka ng dugo o mukhang giniling na kape

• Maitim o tulad ng alkitran na dumi

• Mas maraming laway kaysa karaniwan

• Pagbaba ng timbang kapag hindi mo sinusubukang magbawas ng timbang

• Pamamaos o namamagang lalamunan na hindi mawala-wala